中環出更：維護新移民 蔡耀昌被迫辭任民主黨中委
身兼民主黨中央委員嘅香港社區組織協會（社協）幹事蔡耀昌，日前代表社協促平機會調查有食肆唔招待內地人，並促政府盡快修例將歧視從內地來港嘅新移民或中國公民定為「種族歧視」。事後惹起黨內不滿，六十三名黨員聯署促蔡辭任中委等職務，而蔡尋日喺中委會主動請辭，但表明唔退黨同收回言論，亦唔會辭去社協職務，並暗批該黨無兼顧人權保障問題。
胡志偉：可減少矛盾
蔡解釋，其言論係建基於對人權嘅立場同工作嘅認識，盼大家更以包容嘅態度處理問題，期望社會能繼續喺抗疫工作同維護人權之間取得平衡。該黨主席胡志偉喺會後被問到蔡喺事件犯錯嘅地方，胡話該黨同蔡嘅言論只係站喺唔同角度判斷，該黨以抗疫為考慮，而社協則從法理角度，關注店舖嘅防疫措施係咪涉及歧視。
胡又認為蔡主動請辭係減少可能出現嘅矛盾，亦避免公眾將社協嘅言論投射成該黨嘅睇法，令公眾對該黨出現不必要誤解喎。咁講法，即係蔡冇犯錯啦，但為咗化解黨內矛盾就要辭職，唔知係咩玩法呢？
另外，身兼中委嘅東區區議員蘇逸恒尋日中途離席，之後喺社交平台貼文爆粗鬧「X街蔡耀昌，聽佢講嘢嬲X過對住民建聯，中委會你哋開埋佢，繼續理性討論啦」。蘇事後批評蔡講唔贏人就反口，又覺得會上氣氛太左膠大愛，聽住蔡嘅辯駁都仲可以笑笑口，所以忍唔住就起身嘭門走人。點睇蔡辭中委，蘇話：「好彩決定係咁咋，唔係就一係佢死一係我亡。」
卓妮