中環出更：梁孔德注重健康 唔會捱夜睇波
早睡早起，向來都係健康之道。但對於球迷而言，要睇心愛嘅英超或歐洲足球聯賽直播，就難免要捱更抵夜。卓妮尋日喺沙田馬場見到香港足球總會前主席梁孔德，問佢英國因有球員染疫而暫停足球賽事，會唔會覺得好無癮呢？ 誰知佢嘅回答係，自從卸任足總主席之後，已經無睇夜波好耐喇。
梁孔德話自己近來好注重生活作息，夜晚過咗八點即上床就寢。因此莫講話英超，就算挑燈夜戰嘅本地賽事都唔好預佢喇。佢又話唔單止英國足球賽事要嗌停，就連球員好少身體接觸嘅高爾夫球，美國方面亦宣布取消賽事。雖然球迷都覺得好無奈，不過佢相信大家都會明白，健康嘅考量係最重要。
葉思貝：少咗出街 最好煲劇
喜歡旅遊嘅愛馬女士協會前主席葉思貝（Fione）同夫婿許坤華，就因好多國家都實施入境限制而無得出門，加上為防感染而暫停跟教練學習拉筋運動，出街嘅次數難免會少咗。佢話留喺屋企嘅消遣活動，最好就梗係上網煲劇喇。雖然日韓劇集嘅橋段的確引人入勝，不過Fione就話自己會懂得節制，每次煲劇都係睇兩集左右，因為細水長流，先至免得太快將故事「煲乾」咁話。
健康快車創會主席方黃吉雯，就話本來打算舉辦向兒童推廣繪畫嘅活動，但礙於大家都唔想出席大型聚會，活動可能要延後到年尾。除此之外，為健康快車籌募善款嘅活動，短期內亦難以舉行。佢話自今年一月爆發疫情，健康快車亦進入「停車」狀態，要待適當時候重啟眼科義診。由於目前健康快車對營運資金嘅需求較往常少，因此停辦慈善晚會，影響都唔會好大。
卓妮