政情：陳美齡籲包容才會多姿多采
最近本港紛紛擾擾，社會撕裂，市民出街着乜顏色嘅衫都要諗過度過，因為隨時被標籤為持有某種政治立場人士。曾經被傳係教育局局長人選嘅前歌手陳美齡（Agnes）日前喺社交網站貼文，提到自己時常告訴孩子要接受同包容同自己唔一樣嘅人同事物，仲話「共存共榮是民主的基礎」。唔知Agnes係咪見到本港社會對立情況嚴重，所以有感而發呢？
為三子之母嘅Agnes日前喺其社交網站專頁上載多張靚相，仲貼文話自己時常都告訴孩子，要接受同包容與自己唔一樣嘅人和事物，又話如果世上所有嘅人都係同自己一樣，相信會悶到發霉。佢又舉例，話如果全世界只有一種花朵，一種顏色，一種水果，一種人，會係幾咁可怕，而正正因為有多姿多采嘅事物同人，生活先至精彩，所以要感謝同珍惜各種不同嘅事物同聲音咁話。
「共存共榮係民主嘅基礎」
Agnes又話，共存共榮係民主嘅基礎，希望大家可以互助互愛，不仇不恨，不打不罵，不怒不吼，愛己愛人，發出心中嘅正能量喎。