政情：大汗疊細汗 陸頌雄洗私家街
雖然平時有清潔工人清理街道垃圾，但香港亦都存在唔少私家街同後巷，垃圾堆積冇人清，衞生情況好差，而食環署嘅工人就好難入去清潔。立法會勞工界議員陸頌雄早前就聯同一班義工喺食環署嘅協助下，落手落腳清理嗰區其中一條私家街，仲慨嘆清潔工唔易做。
陸頌雄喺社交平台上載咗一段短片，見佢同班義工去到一條私家街，嗰度鋪滿垃圾，有好多棄置嘅紙皮同發泡膠箱，見佢執垃圾執到大汗疊細汗，全程都係搬搬抬抬，將啲垃圾分門別類，又彎低條腰擦地。但睇嚟都好熟手喎。
嘆清潔工不辭勞苦唔易做
查實佢都唔係第一次做清潔工，事關喺前年暑假尾聲，佢都試過全副武裝落區體驗清潔工人嘅工作，仲將垃圾膠袋變身做雨衣，喺落住雨嘅情況下工作咗幾個鐘。
喺清理咗私家街嘅垃圾後，佢更慨嘆清潔工唔易做，又話一班清潔工友不辭勞苦咁去為社區服務，絕對需要大家群策群力，一齊去建設，先會令社區變得更美好。