中環出更：回憶「童」趣中秋 鄧明慧以為月亮跟住自己走
「一年容易又中秋」，下個禮拜五就係中秋節，離唔開食月餅、賞月同玩燈籠呢啲活動，東華三院副主席鄧明慧（Mandy）出席工商界十一酒會時憶起兒時往事，自爆細個時覺得中秋節個月亮零舍大，以為個月亮會一路跟住佢返屋企，大個才發現原來係自然現象嚟。唔知依家啲小朋友又有冇同一個諗法呢？
Mandy話，以前過中秋，總會同成班親戚喺食完飯後，去公園談天說地、席地賞月，讀書時，臨近中秋都會整燈籠，佢就諗到一個「出貓」嘅方法，就係買一個現成燈籠，然後撕走外層嘅玻璃紙，再貼番一層紙上去，當係自己嘅勞作製成品交功課。嘩，聽落都有啲曳喎！
陳光明有得歎印尼特色糕點
講起中秋，香港中華總商會常務會董陳光明（Johnny）就話，媽咪係印尼華僑，每逢中秋節都會拜月光，有生果、雞同燒肉外，亦都有印尼特色糕點食。咁多好嘢食，聽落相當豐富咁喎！佢又話，細個嘅時候，會用啲月餅罐裝住啲蠟燭，一盤盤好光咁當係燈照明。聽落就幾靚嘞，不過真係要小心安全呀！
至於本身係潮州人嘅香港中華廠商聯合會（廠商會）常務會董蔡少森（Philip）就會食潮州月餅應節，佢話潮州月餅同傳統月餅唔同，外面塊皮係用酥皮做，餡料都係以蓮蓉為主，食落去嘅味道，就似酥皮蛋撻咁樣，而且潮州月餅係用豬油整，食一個已經好滯，所以佢會飲鳳凰山功夫茶消滯，但係呢種茶，就唔可以一次過飲太多，飲三杯仔已經好夠。至於廠商會副會長吳清煥就話，細個嘅時候物質唔多，中秋節冇乜嘢玩，不過後來大個咗，就會整燈籠畀仔女玩咁話。
卓妮