政情：雪櫃貼蕭嘉怡海報 張嘉恩：純粹攝影角度欣賞
唔少人年輕時都會有迷偶像、儲海報嘅行為，早前見到民建聯小花、中西區社區幹事張嘉恩（Iris），佢話屋企只有一張海報，但竟然唔係明星，而係中西區前區議員、現任政務司司長政治助理蕭嘉怡，唔通佢係蕭嘉怡嘅忠粉？
喺蕭工作報告度搣落嚟
Iris就話呢張蕭嘉怡嘅海報已經貼咗喺雪櫃好多年，唔係喺街邊見到撕落嚟咁誇張，只係喺蕭嘅工作報告度搣落嚟啫。佢仲好似小粉絲咁，話張海報係蕭嘉怡好認真喺街上數巴士數目嘅相，而且係黑白印製，睇落「好有Feel」同埋影得靚，所以就特登貼出嚟，純粹從攝影角度欣賞喎。
佢之後講到，以前學校門口就有蕭嘉怡嘅橫額，當年都唔知乜嘢叫做區議員，但之後竟然喺活動上見到蕭，就好似見到明星一樣，數吓數吓都差唔多十年前嘅事喎。而佢之後亦開始幫蕭做義工，仲拉埋屋企人一齊去，難怪佢屋企人接受到張海報，又唔覺呢個行為奇怪喇！