中環出更：黃士心帶隊遊不丹 巧遇虎穴寺雪景
有「旅遊教父」之稱嘅中華總商會常董黃士心（Jackie）同中華廠商聯合會名譽會長李秀恒（Eddy）等一班老友，逢親農曆新年就會一齊去旅行，早前佢哋去咗「快樂國度」不丹。一場來到，梗要去世界十大廟宇之一、位於海拔三千多公尺嘅虎穴寺。點知遇上落雪，未登山前大家都擔心連寺院都見唔到，估唔到竟然見到如畫靚景，輕盈白雪披掛喺山頭同樹枝上，山下仲有雲彩，團友們大讚執到寶。
鍾意影相嘅Eddy最開心，因為一般人影到懸崖邊上嘅虎穴寺風景都係藍天白雲，難得見到雪景，梗係狂影一番，仲打算遲啲出攝影集。佢哋仲去咗參觀不丹郵局，郵局提供自製肖像郵票服務，大家都好開心玩埋一份，Eddy仲即刻用自製肖像郵票寄明信片返香港添！
顏寶鈴想睇動物大遷徙
今次為期五日嘅「純淨之旅」，團友除咗Jackie太太Stella同兄嫂、立法會議員謝偉俊等舊班底之外，仲有唔少新成員，包括保良局前主席顏寶鈴，Eddy嘅女兒李楚洳同埋女婿朱俊傑都有同行，個個都對呢趟尊貴之旅讚不絕口。
Jackie就笑笑口話，路線同行程安排係佢大仔、香港旅遊業議會主席黃進達嘅傑作，最重要係今次坐包機去，唔使轉機咁辛苦。由於太好玩，顏寶鈴仲開出一張願望清單，例如想去非洲睇動物大遷徙、追極光等，睇嚟以後Jackie嘅旅行團又多一個成員喇！
卓妮