立法會已成立《國歌條例草案》委員會審議草案，截至上周三有六十名議員報名加入委員會，泛民及建制兩大陣營「冧友」情況再現，不過擁七個議席嘅民主黨（白鴿黨）當時只有四員參加，該黨政制事務發言人黃碧雲（一舊雲）更聲稱唔使「冧友」添！不過，委員會尋日凌晨出最終名單顯示共有六十四名議員加入，白鴿黨更係全體議員加入，唔通怕被問責即刻轉軚？
根據文件，全體六十九名立法會議員只有五人未有參加委員會，包括立法會主席梁君彥、勞工界潘兆平、地產及建造界石禮謙、紡織及製衣界鍾國斌及醫學界陳沛然。一舊雲接受查詢時否認轉軚，話從來冇要求該黨全體議員加入，向來做法都係只要有代表即可。而突然轉軚加入嘅白鴿黨議員包括尹兆堅（肥尹）、林卓廷及鄺俊宇，肥尹則強調一早已交表，黨團討論時都認為法案重要，大家會盡量加入，絕非因受壓而轉軚喎。另一議員容海恩亦加入咗委員會。