政情：為防民主派拉布 古洞北規劃打尖

政府為咗新界東北發展實行「快刀斬亂麻」，去年十二月先為古洞北和粉嶺北新發展區首階段基建工程刊憲，今年一月即交到立法會發展事務委員會審議，至上周再向工務小組遞交文件，日前再「打尖」喺本周三工務小組會議討論，項目正好安排喺具爭議嘅北區沙嶺興建有機資源回收中心第二期之上，以免建制派拉布或影響發展區撥款。

盧偉國斥審議慢 將不停加會

有資深建制派話，今次發展區撥款喺發展事務委員會討論時出奇地順利，民主黨都話支持，估計政府係見勢頭好先盡快交到工務小組。工務小組委員會主席盧偉國就慨嘆，今年預計要審議一千八百多億元嘅工程，截至上周三會議只係通過咗二百多億元，不點名批評議員就部分冇爭議項目動輒都傾兩三個鐘，影響進度，所以嚟緊日子要不停加會，強調審議進度慢，政府就當然想將準備好嘅工程盡快推上會先喎。

慢必：政府不應夠票數就硬闖

慢必回覆查詢時話，一份文件包含土地賠償同工程嘅做法係近年少見，喺內容相對複雜嘅情況下，難於幾分鐘內問晒，暗諷有議員仲心急過政府，早早為當局開路，但當局亦唔應該因而有恃無恐，數夠票就硬闖。朱凱廸就話，近廿年冇乜做過發展區，今年又冇乜大工程要上，唔知政府有乜咁迫切，而問題係點樣審議，佢最關心區內動物遷移同有木廠要搬遷等問題仍未處理，擬於日內爭取同盧偉國討論審議程序，睇吓可唔可以有多啲時間，以令政府回應訴求。

但有民主派議員認為，政府應該係擔心激進民主派拉布，批啲唔批啲，先會綑綁咁多項目。而最新文件顯示，當局已做到大部分溫和泛民提出嘅要求，相信今次審議阻力不大。查實新界東北發展爭議幾近「水尾」，溫和泛民都話支持，只要認真處理該做嘅事，唔知發展局局長黃偉綸做乜要夾硬「打尖」咁肉酸呢？