中環出更：彭耀佳新年偷閒遊札幌
對於熱愛旅行嘅香港人嚟講，農曆新年假期係一個外遊嘅好時機，不過新年習俗多，好多時都要拜年，到底兩者之間點樣平衡先好？香港總商會前主席彭耀佳就話自己通常會預留年初一、二用嚟拜年，初三就出發去旅行，好似今年就去咗日本札幌玩幾日，話咁多年嚟都未睇過札幌嘅花祭，所以今年特意安排去睇一次。
彭話平時工作非常繁忙，好難抽時間外遊，所以每年都會趁住農曆新年有較長嘅假期去旅行放鬆吓。不過要喺農曆新年放大假都唔容易，唔單止要遷就拜年嘅時間，仲要做晒啲工作先得，所以過年前忙上加忙，當日卓妮就喺中環見到佢忙到氹氹轉啦。
莊家彬忙到好少食飯時間
早兩日卓妮都喺中環撞到香港菁英會主席莊家彬，見佢買咗六件壽司急步行，原來嗰份係佢嘅午餐嚟。佢話新年好多春茗、團拜，加上公司好多事務要處理，食飯時間唔多，所以就買啲方便又簡單嘅食物充飢。佢都有趁假期同屋企人去菲律賓宿霧旅行，玩吓水上活動，享受吓當地嘅陽光與海灘。
立法會金融服務界議員張華峰嘅太太同女兒都去中環行街買化妝品，張太話佢哋一家三口早前已經去新加坡玩，因為肥老闆好鍾意肉骨茶同豬肚湯，所以趁假期去玩幾日，雖然呢啲食品都偏肥膩，但新加坡勝在夠熱，行吓可以出身汗，所以都冇大問題喎！張太仲話囡囡啱啱畢業，過埋年就會搵工，亦唔排除最後去爸爸公司幫手咁話喎。
卓妮