政府實施公共交通費用補貼計劃，市民尋日起終於可以喺各大港鐵站、輕鐵客務中心、指定渡輪碼頭內設置嘅補貼站領取，連便利店都攞到。市民只要用八達通卡喺補貼站拍卡就可以領取，有市民就話「嘟一嘟」就攞到補貼都算便利，直言「唔使好似申請四千蚊咁煩又擾民」。主責政府派發四千元關愛共享計劃嘅財政司司長陳茂波，派錢都派到一鑊粥，市民拎交通費補貼都念念不忘要揶揄佢踩多兩腳，唔知主責交通費補貼嘅運輸及房屋局局長陳帆會唔會偷笑呢？
