政情：無懼鄉委會求下籤 莫錦貴有得留低
沙田鄉事委員會（鄉委會）喺農曆大年初二為沙田求得下籤，但似乎並唔代表會倒楣，事關該會主席莫錦貴尋日喺鄉委會社會賢達選舉中先下一城。沙田鄉委會即將換屆，合資格競選正副主席嘅有上月選出嘅村代表外，仲有十二名社會賢達，而莫錦貴上次就係循社會賢達進身鄉委會同埋當選主席喇。
李世榮掹車邊贏藍國賢
社會賢達選舉由廿四人爭十二個位，候選人分成兩大陣營，最終莫錦貴一方全取十二席，其中莫以票王姿態取得六十四票當選。而新選出嘅社會賢達中，就有兩位為沙田區議員，分別係董健莉同李世榮，但李世榮就獲五十票掹車邊當選，以兩票之微險勝排十三嘅前鄉議局副主席藍國賢。
李世榮直言選情險過剃頭，因為票數相同就要以抽籤決定當選人，要睇最後一票先分出勝負，笑稱太刺激，下次要再考慮選唔選喇。不過，佢話議會工作與鄉村息息相關，與村民多接觸同貢獻都係好事喎。