中環出更：顏吳餘英明碼實價賣海鮮 打破三亞「劏客」文化
有「中國夏威夷」之稱嘅海南島三亞，係好多北方人冬天嘅避寒勝地。中華廠商聯合會名譽會長顏吳餘英日前喺一個團拜活動上話，近兩年佢都去三亞過年，事關佢喺當地投資一間五星級酒店，配套仲有環球美食街及類似鯉魚門嘅海鮮市場等。顏太話，三亞海鮮檔劏客問題嚴重，佢就堅持明碼實價，誓要打破當地劏客文化，結果開張冇耐就獲當地政府肯定，覺得好鼓舞。
顏太今次帶埋仔女同孫仔去，直言好熱鬧，美中不足就係機票太貴，只得兩間航空公司提供服務，航空公司又唔肯加多啲班次，結果香港往返三亞嘅機票由原本一千多元加價到四千多元，佢仲試過有一年要用八千多元撲飛添。
當日其實係香港潮屬社團總會（總會）團拜，總會主席陳幼南、觀塘區議會主席陳振彬同中華總商會常務會董張俊勇等人都去互道恭喜。講開過年，陳振彬近廿年來都係去泰國過，目的係去探望工廠員工。原來佢喺泰國仲有一間廠，員工有成千人，不過已經交晒畀員工打理，由於當初講明賺錢就分三成畀佢哋，所以員工做得好好，唔使佢操心，只係一年出現一次去頒獎畀表現出色嘅員工就得喇。
馬介欽話開餐廳要講特色
做飲食業生意嘅中華廠商聯合會副會長馬介欽都在場，佢話依家開餐廳要講求特色，昔日佔地幾萬呎嗰種傳統中菜酒樓已經好難做，要化整為零、主打特色菜，以迎合食客口味轉變。轉頭卓妮就見到香港旅遊業議會主席黃進達，已有一名囝囝嘅佢又有添丁之喜，太太預產期係本周一（18日）。咁啱政府剛通過增加男士侍產假，咁佢咪可以趁機抖多幾日陪太太？佢笑住話唔係o架，因為旅遊業如果有咩事都一樣要即刻出來回應咁話。
卓妮