最近政府收緊長者綜援申領門檻，將申領嘅合資格年齡由原來嘅六十歲上調至六十五歲，畀社會鬧爆涼薄同苛刻，負責綜援政策嘅勞工及福利局局長羅致光成為眾矢之的。香港大學民意研究計劃最新一份民調顯示，羅致光嘅民望插水，支持度淨值勁跌廿一個百分點，成為跌幅最大嘅局長。而同羅致光名字同音嘅公務員事務局局長羅智光，其民望淨值亦下跌十三個百分點，成為跌幅僅次於羅致光嘅局長。不過公務員事務局最近並冇重大政策推出，羅智光因乜解究民望插水呢？唔通係受到同名之累？
