政情：楊哲安行山 最怕遇到蛇
早前有年輕人行山時遇到意外不幸喪生，原因係手機收唔到信號而遲咗被救援。經常行山嘅中西區區議員楊哲安（Jeremy）話知道消息後都好難過，佢自己行山都準備充足，帶齊手機、電筒、食物、水、行山杖等，行山路徑就多數喺港島區，手機信號大多較好，未試過收唔到，而佢每次行山都一定會話畀屋企人知，有咩事都可以盡早收到消息咁話。
至於行山最驚乜嘢，Jeremy就話係蛇，所以會帶定行山杖，邊行邊打草，如果真係見到蛇，就會大力啲行，而且每步都用力揼落地，等啲蛇感受到震動同聲響就會驚喎。佢又提到，見到野豬、箭豬等動物都要小心，唔好畀佢哋整傷。
指野豬投訴減 因居民唔敢出街
近年野豬數量愈嚟愈多，更逐漸深入民居，又摷亂垃圾桶，雖然漁農自然護理署話近年投訴少咗，但Jeremy就話其實係市民開始識驚，唔敢出街，所以先投訴少咗，即係「斬腳趾避沙蟲」。佢認為漁護署應該快啲做嘢，控制吓啲野豬先啱。