政情：柯仔三屆冧莊 傳快必想單挑
今年底就係區議會換屆選舉，唔少黨派都已經開始部署，過去唔少同時兼任區議員嘅建制派立法會議員都成為被狙擊對象。近日有指人民力量副主席譚得志（快必）有意挑戰連續三屆喺觀塘區議會廣德選區自動當選嘅立法會議員柯創盛（柯仔）。其實兩人早喺二○一六年立法會換屆選舉已經交過手，今次區議會選舉再次碰頭，唔知柯仔會唔會成為前立法會議員鍾樹根翻版呢？
柯仔喺一九九九年首次參選區議會就成功當選，至今已擔任區議員廿年，過往三屆更係自動當選。被問到擔唔擔心被快必狙擊，佢就話雖然過往多屆自動當選，但對自己嘅地區工作好有信心，畢竟佢喺當區深耕細作多年，而無論係進身立法會定爭取區議會連任都離唔開地區工作嘅，加上佢暫時都未見對手喺該區掛橫額、擺街站，故此對選情都有信心。
新丁挑戰 麥美娟冇有怕
被狙擊嘅仲有本身為葵青偉盈區議員嘅工聯會立法會麥美娟（Alice），有指佢將面對公民黨新丁冼豪輝挑戰，而身兼屯門樂翠區議員嘅立法會議員何君堯就將會同民主黨盧俊宇交手。至於同柯仔一樣同屬民建聯（民記）、呢屆區議會換屆時都係自動當選為北區欣盛區議員嘅立法會議員劉國勳，其對手就係新民主同盟女將林淑菁。
面對對手Alice就冇有怕咁款，話有人挑戰係好事，其團隊見到對手出現，工作都更加認真、更加「有火」，過往聖誕、新年等節日都有同事放大假，今年就冇，齊齊努力工作備戰。佢又話對手喺大半年前已出現，但對方多數都係一個人出動，好少突出政黨背景或者有前輩帶住，唔知係咪採取「去政黨化」策略喎。
何君堯劉國勳好有信心
何君堯就強調自己幾時都做好最高準備，加上佢每周都有擺街站同市民見面，所以對自己嘅地區工作都有信心，揚言「唔使擔心，但要小心」。不過佢都承認嚟緊呢一年可能會調整花喺立法會同區議會嘅時間，喺選舉年更加重視地區工作。劉國勳就話，見到對手喺當區已一段時間，但佢自己都經常落區，地區個案都親力親為跟進，估計自己都有一定支持喎。
聽落好似個個都好有信心，雖知民記前立法會議員鍾樹根亦曾擔任東區區議員多年，惟二○一二年成為立法會議員後，隨即喺一五年區議會選舉敗北，最後更連立法會都冇連任，變成雙失。唔想變鍾樹根翻版，雙料議員都要嚴陣以待喇。