財政司司長陳茂波(波叔)上任以來年年都估錯數,透過關愛共享計劃向市民派發四千元又搞到一鑊泡,等成年兼申請手續繁複,加上本年度嘅財政盈餘預料大減,派糖措施自然凍過水,市民唔嬲就假喇。
波叔尋日出席沙田馬場賀歲馬時三度被噓,相信市民新正頭焗住噓佢都感到掃興。
波叔尋日朝早主持綜合匯演暨開幕典禮,入場時被馬迷喝倒采,傳來一陣噓聲。
佢其後為第八場賀年盃擔任頒獎嘉賓,入場及頒獎時兩度遭在場馬迷喝倒采。佢離開時冇亦回應財政預算案及被噓等問題,只係祝賀在場記者「恭喜發財、身體健康、萬事勝意」。話時話,乜財爺呢個時候唔係要閉關準備財政預算案咩?咁得閒出風頭嘅?