中環出更：股市向下探底 王夏陽轉玩收藏藝術品

早幾年大舉投資舖位及車位嘅Sunny笑言，去年開始已經叫大家咩都唔好做，不過最近佢接觸到藝術品市場之後，開始小試牛刀，了解愈多就愈睇好未來潛力。喺銀行做家族信託管理業務嘅Connie話，中國藝術品投資愈嚟愈流行，最近佢買入一位本地嶺南派畫家嘅作品，笑言自己只係附庸風雅，買嚟玩吓啫。佢鍾意顏色繽紛嘅畫作，一來可以掛出嚟欣賞，二來可以坐等升值，諗起都開心。

講起投資藝術品，收藏家團體求知雅集玉器顧問鄭優美自然好有心得，事關佢家族四代人都係做古董買賣。最近見佢出出入入不時要揸拐杖，隻腳好似傷得唔輕。佢苦笑話，今次受傷都怪自己太認真。

鄭優美拗柴 坐輪椅成個月

原來鄭同Connie都係中總青委嘅羽毛球隊隊友，經常拍住去參加比賽。有一日佢朝早先同Connie練兩小時，下午又再同教練繼續打，原本想再打兩個鐘，結果打到一半隻腳突然拗柴，打石膏、坐輪椅成個月，後來擺脫咗輪椅就轉用拐杖，到依家都仲未完全好番晒，真係陰功豬喇！

卓妮

梁穎雯對呢幅畫作愛不釋手。

鄭優美講起打波受傷經過，七情上面。