政情：曾麗文得票少 被沒收5萬保證金
上年十一月底舉行嘅立法會九龍西補選，候選人嘅選舉開支陸續出爐。報稱無黨派嘅曾麗文，今次補選一共使咗一萬零二百二十五蚊，最終佢只獲得一千三百零七票，即一票大約係七點八元。但由於佢嘅得票率不足法例規定嘅有效選票總和嘅百分之三，所以唔止選舉開支，就連五萬蚊嘅選舉按金均會被沒收。
印刷宣傳品佔開支七成
睇番曾麗文嘅開支，有七成幾都係用喺印刷宣傳品上，其餘都係影相費、交通費及行政費等一般開支。而佢亦申報有九百九十九蚊嘅選舉捐贈，但就冇標明係由邊個捐嘅。另外，佢亦申報自己有四張單據遺失咗，當中有三張係印刷宣傳品，另一張係運輸費用。
沙田區議員陳國強喺提名期時亦有報名參選，但因為喺報名時冇交到選舉按金而冇得參選。不過佢都有交選舉開支申報，但一蚊都冇用過，連影參選相都冇預先影添！