政情：後市玄機？林正財買車位放租
行政會議成員熟悉本港政策情況，其投資決定或多或少都預示本港最高決策機關點睇後市。近日車位價格回落，行政會議成員林正財都申報買咗個車位放租，唔通覺得好抵買？
林正財喺本月初申報買咗個中西區嘅車位，擁有百分百權益，以作出租之用。睇番佢之前申報嘅自住物業喺九龍城同中山，出租物業喺荃灣，呢個位於中西區嘅出租車位，似乎都唔係一個太短線嘅投資。
李國章去年減持一單位
有人買車位，有人就減持，行政會議成員李國章去年十一月十九日申報刪去一個油尖旺區內地段物業，睇嚟應該係減持咗個單位。行會成員睇後市睇得準唔準，大家就自行判斷嘞！