政情：脫歐動盪 高叔平趁亂買英國樓
香港經濟氣氛麻麻，好多投資者都遠離股市及樓市，以靜制動。投資瓣數多嘅上海總會副理事長高叔平（Henry）早前睇好債市，最近就靜極思動，開始備足彈藥去歐洲多個國家掃入房地產。佢笑笑口話，特別係被脫歐問題困擾嘅英國，投資機會浮現，最近佢就出手買入當地物業作投資用途喇！
Henry早前去咗一趟英國同埋波蘭，發現當地嘅投資情緒仍然唔穩定，尤其係英國，個個都好驚脫歐帶來震盪，所以通街有平貨執。
佢已設立一個基金專吼歐洲房地產市場，睇好嘅仲包括法、德、荷蘭及丹麥等國家。
開始睇埋本地豪宅
至於香港樓市，Henry認為美國已放風會減慢加息步伐，所以佢開始睇緊本地豪宅嘅投資機會，如果按樓市高峰期嘅成交價計，下跌百分之十五都算唔錯。不過對普羅市民嚟講，都係等三月一日中美貿易談判期限過咗，貿易戰係咪真係落幕先喇！