中環出更：一年涉379宗申訴食衞局「稱王」

立法會要審議法例同議案外，仲有申訴部處理市民對政府政策及措施不滿嘅申訴。根據立法會二○一七年至一八年年報，申訴部收到涉及食物及衞生局嘅申訴個案有三百七十九宗，成為眾多政策局及部門之冠，仲較一六至一七年度多咗三百宗添。申訴個案排第二嘅係運輸及房屋局，共有一百七十二宗，而排第三就係發展局，有九十五宗。

申訴部收到涉及食衞局嘅個案，主要係關於食環署跟進冷氣機滴水問題、實施對進口蔬果安全嘅監控制度成效不彰，申訴部已經向當局書面轉介或開會提出個案。咁啱尋日又爆出食衞局局長陳肇始同副局長徐德義唔出席立法會政府帳目委員會有關食物進出口管制問題嘅聆訊，因而被議員鬧爆，睇嚟陳肇始真係要檢討吓。

至於運房局方面，常見嘅個案都係同廣深港高鐵香港段一地兩檢安排、定額罰款條例等有關。而發展局方面，主要申訴個案係關於東涌新市鎮擴展嘅填海及前期工程、中環海濱活動空間舉辦以成人為主題嘅嘉年華會等。此外，房屋署、運輸署、保安局及社會福利署嘅申訴，都分別最少各有五十宗。

卓妮

中環出更：一年涉379宗申訴 食衞局「稱王」