中環出更：$8000買桃花過年鄧明慧嘆愈嚟愈貴
農曆新年臨近，唔少人都鍾意買桃花裝飾家居或寫字樓，討個好意頭。東華三院總理鄧明慧（Mandy）就每年都會訂定桃花、水仙或蘭花等擺喺屋企，不過佢話桃花愈嚟愈貴，以前只係二千幾蚊，今年已升到八千蚊添！
Mandy每年都留港過年，由於屋企長輩多，所以大家多數去佢屋企拜年，次次食飯都有兩、三圍人。賀年食品咁多，好多人忍唔到口而食到肥咗，Mandy就教路用易潔鑊煎年糕，咁就唔使用咁多油，食一件半件都唔怕，最緊要係忍口唔好食瓜子、花生及開心果等，因為熱量高，咁就一磅都唔會重啦！
馬清揚搭飛機派利是畀仔女
當日係東華喺馬場舉行盃賽，主席王賢誌、副主席文穎怡、馬清揚、韋浩文及執行總監蘇祐安都有出席。馬清揚過年打算去美國同英國探讀緊書嘅仔女，每個地方留四、五日。外國學校喺農曆新年當然冇得放假啦，所以佢特登飛過去畀封利是佢哋，加上佢哋就快生日，順便送上雙倍利是及生日禮物，真係廿四孝父母。咁啱王賢誌及另外一、兩位總理都會趁過年去倫敦，可能大家趁機喺倫敦一聚，當搞個小型團拜喎！
韋浩文都打算留港過年，佢笑稱自己唔識煎糕，但就好鍾意食，所以去拜年時通常準備個肚去食嘢。去拜年自然要帶啲賀禮畀長輩，佢話近年買少咗朱古力同曲奇，傾向買得健康啲，可能會買吓海味咁話。近年流行送日本水果，佢就話生果唔擺得，加上比較重，親戚攞走未必咁方便，所以就算喇！
卓妮