政情：公民講場：醫護狂噴陳肇始 申訴大會開唔完

公立醫院醫護人手短缺唔係今日先爆出嚟嘅問題，尤其係呢排流感爆發高峰期，但醫院淨係加床唔加人，搞到班醫護人員一肚火，早前更上街怒吼，但係啲怨氣未消，稍後仲會有一場閉門嘅申訴大會，到時仲會邀請食物及衞生局局長陳肇始到場添，到時班醫護人員肯定對住陳肇始噴火。其實，年年公院都爆晒廠，政府口口聲聲話去改善，但仍然係倒瀉籮蟹，反映政府根本冇吸取教訓，不斷重複犯錯，令醫護人員同病人都受苦。