政情：陳年黑醋煮意大利菜 顏吳餘英一試難忘
早前咁啱喺金鐘某個超級市場遇到中華廠商聯合會名譽會長顏吳餘英，當時佢喺度揀緊貴價嘅陳年黑醋。原來顏太早前品嘗一道意大利菜，只係橄欖油煎芝士再加幾滴黑醋就令佢回味無窮，所以諗住照辦煮碗，煮番同一道菜，同老公喺屋企撐枱腳。
配搭得宜最重要
究竟點揀靚黑醋？顏太話以前試過買逾千元嘅意大利陳年黑醋，所以佢認為要達到理想嘅效果，就要用貴價貨。之不過，貨架上嘅陳年黑醋種類繁雜花多眼亂，到底要揀邊樽黑醋至啱用呢？結果喺店員嘅推介下，配合芝士食用嘅黑醋唔使一百蚊就有交易。
雖則話一分錢一分貨，但講到煮嘢食，都係配搭得宜最重要。店員幫顏太慳番唔少錢，佢最後仲買多支黑醋，畀老公用嚟蘸麵包咁話。