政情：購物城冷清清政府出手象哥有救

近年愈來愈多內地廉價旅行團嚟香港，每團幾十人咁湧落地區，逼爆九龍城、土瓜灣、東涌等非旅遊區，嚴重影響市民日常生活，個個叫苦連天。議員葛珮帆尋日喺立法會提口頭質詢，話依家情況好嚴重，政府啲措施冇力，直斥當局喺度「Hea議會」，建議向旅議會提出，停止為遊客過多地區嘅店舖辦理登記為該會轄下嘅登記店舖，並協助已登記店舖遷往其他地方經營。

議員梁美芬亦炮轟政府到底有冇落過地區視察？啲廉價團塞到嚇死人，有冇諗過將唔同消費能力嘅旅客分流到唔同區？係咪可以將啲朱古力舖、珠寶店或出名食肆引去啟德郵輪碼頭？佢更強調市民不滿，問題不在於旅客，而係政府，唔好搞到居民同旅客對立。

分流旅行團去食飯

商務及經濟發展局副局長陳百里回覆時就「錄音機」上身，用「數白欖」式講番個局做咗乜嘢，長遠而言旅監局都會做嘢，又話旅議局上月已經發文件，要求新登記店舖提供人流及車流管理方案，經審視後先批出申請，已經提高申請門檻，亦會研究調遷方案等。最離奇係佢一再推銷自己前日落區，話好明白大家講緊乜嘢，真係聽到大家反晒眼。

陳百里更突然「自爆」，話明白旅客等位食飯影響地區，所以同購物城傾緊，希望可以安排旅客到港後，先去城內食飯，就有望做到分流。象哥承認同政府磋商緊，有好多細節要傾，但呢個計劃唔係政府獨有，購物城喺落馬洲口岸附近，開咗港珠澳大橋後，旅行社已反映想去購物城食飯，順路之餘，仲可以解決市區團餐供不應求問題喎。

恐被質疑干預市場

呢個魔鬼交易會唔會成功呢？仲係未知之數，但政府出手「拯救」私營公司，難免會被人質疑當局干預市場。政府今日幫得購物城，他日阿茂開個市集冇人流，政府又係唔係要幫呢？