中環出更：周錦威勤練長跑後生咗又瘦咗
近日潮玩#10YearChallenge，卓妮早前喺香港島各界聯合會第九屆理事會就職典禮上，遇到香港五金商業總會理事長周錦威，佢自爆十年前「又肥又脹」，但十年過去已變得後生咗、瘦咗，事關佢由踩單車轉咗去玩長跑，話跑步健康好多，喺減肥keep fit方面成效比較好，所以咪瘦咗靚仔咗囉！
點解突然走去跑步？周錦威直言係貪靚，佢以前幫襯過一啲減肥服務，試用嗰啲減肥機，不過減一吋就已經要一萬蚊，兩吋就要兩萬蚊，唔單止貴，成效只係一般。後尾諗諗吓就不如試下跑步，咁就可以慳番好多錢喇，時至今日佢仲經常參加馬拉松，仲話身邊啲人睇住佢瘦，搞到唔少朋友見到都話要一齊跑喎。
陳李妮：點可能冇衰老
香港島各界聯合會理事長蘇長榮當然一早嚟打點，而東華三院副主席譚鎮國同博愛醫院前主席陳李妮（Lily）都有嚟撐場，Lily外表睇落同十年前冇乜分別，但佢都感慨「點可能冇衰老吖」，只係有一啲小秘訣去延遲衰老，例如每日瞓足八個鐘、唔好偏食等，雖然聽落好普通，但查實佢初初踏足職場已開始呢個習慣，能夠「凍齡」絕對係堅持多年嘅成果。
香港島婦女聯會副秘書長歐陽鳳盈就話要搵番十年前嘅相唔容易，最終搵到《東方日報》十年前報道過佢做義工嘅相，原來佢一直都係以做長者義工為主，佢話今時今日香港有好多獨居老人，而佢哋其實對物質嘅要求唔高，反而係想有多啲人同佢哋傾計，所以做義工正正可以幫到佢哋。
卓妮