政情：鄭泳舜羨慕愛犬瘦削跑得快
一班「男人老狗」聚埋一齊，有乜嘢話題最啱傾？立法會議員鄭泳舜（Vincent）早前聯同油尖旺區議會主席葉傲冬、中西區區議會副主席陳學鋒等一齊帶埋愛犬去到金鐘添馬公園，齊齊大談「湊狗經」，原來佢哋幫家委會拍攝雜誌封面，所以就帶埋狗仔出嚟，互相分享同狗仔相處嘅基本學問囉！
入立會後明顯發「腹」
Vincent養咗兩隻惠比特犬兩年有多，雖然隻狗睇落相當瘦削，但原係運動健將，經常同Vincent一齊跑山。不過Vincent自從今年三月進入立法會後，工作愈嚟愈忙，做運動嘅時間少咗，經常畀人笑明顯發「腹」，搞到今次拍攝期間再同愛犬一齊跑時，Vincent都覺得自己好笨重，非常羨慕又瘦又跑得快嘅愛犬，睇嚟Vinecnt都應該抽番多啲時間做運動，如果唔係下次就完全追唔到兩隻愛犬喇！