政情：自種蔬果唔用農藥 陳銘富食蟲蟲食剩嘅
唔少住喺郊區嘅名人都會喺自己屋企種蔬果，享受吓田園樂。港澳台灣同鄉會會長陳銘富住喺元朗錦田，屋企門外就有一萬多平方呎嘅農地，自家種嘅生果同蔬菜基本上都可以自給自足唔使買。
自己種嘢梗係唔會噴灑農藥，有啲人會自製辣椒等有機殺蟲劑，不過陳就笑笑口話，佢多年嚟都堅持唔用任何殺蟲劑，所以平時都係食蟲蟲食剩嘅，真係搞笑。
陳家農場種嘅水果都係台灣品種，包括楊桃、荔枝、龍眼、木瓜、檸檬同番石榴等。陳銘富話試過種台灣知名嘅蓮霧，但係毛蟲真係多到嚇死人，所以最後都係放棄。由於唔除蟲，所以佢特登種啲唔係咁惹蟲嘅菜，例如韮菜、油麥菜同番薯葉，聽落都幾醒目喎。
可以唔使再買菜
佢又話，基本上蔬菜都可以自給自足，唔使再買，只係去街市買吓魚同肉就得，至於水果就間唔中買，不過就唔係因為冇收成，而係有時食厭咗，想換吓口味咁話。