政情：伍婉婷漂完書後悔 舊書店盼「重逢」
唔少人都有「陪瞓」物品，可能係毛公仔或手巾仔，灣仔區議員伍婉婷自言每晚「唔摸吓本書就瞓唔着」，仲話屋企藏書多到夠做傢俬o架，放部電視機上去都無問題。屋企書多成咁，皆因唔捨得扔，甚至係送人都唔肯。
只放個人著作就唔心痛
伍婉婷笑言曾經參與近年興起嘅「漂書」活動，即係將自己睇完嘅書放喺公眾地方，等有緣人攞去睇，以推廣閱讀風氣。佢曾經漂咗一本有關舞台劇嘅書出去，點知後來愈嚟愈掛住本書，依家經過啲賣舊書嘅書店，都會望吓想搵番本書喎。佢笑言，自此參與漂書活動只會放低自己嘅著作，就唔會咁心痛喎。