政情：容海恩下周三剖腹生B仲未改好名
立法會議員容海恩上年與當時同政黨嘅政策總裁袁彌昌奉子成婚，容將喺下周三剖腹生BB，成為首個任內生BB嘅女議員。現時距離與BB見面不足一個星期，不過兩人都話中英文名都仲未改好喎。
需依族譜為昌字輩
容海恩話，BB按族譜改名，將會係「昌」字輩，中文名由袁彌昌負責，英文名就由容海恩諗。袁彌昌就話，已經列出一張名單，但仲要繼續睇書去諗，今個周末會畀其他人過吓目先。而容海恩就話，要按中文名改個配合到嘅英文名，目前都仲係諗緊邊個字首嘅階段，睇嚟改名真係一個大工程。不過容仲要求老公幫手諗多個花名喎，睇嚟呢位新爸爸要諗爆頭喇。
另外，老人家話坐月期間唔可以洗頭，容就話已經剪短咗頭髮作準備，以免一段時間唔可以洗頭，變得黐立立咁話。