中環出更:泛民不滿特首晤建制 何君堯鬧犯賤

政府尋日宣布為收緊長者綜援門檻風波嘅補鑊措施,但係特首林鄭月娥前日只約見建制派放風,搞到一眾民主派議員強烈不滿。尋日喺立法會內務委員會上,泛民要求委員會主席向政務司司長反映,只見建制派議員係咪搞分化?素來言論出位嘅獨立建制派議員何君堯就發言寸爆泛民犯賤,引起泛民嘩然。

何君堯話,近年政府同立法會嘅溝通明顯多咗,例如增設更多嘅特首答問大會,不過泛民多數都係用呢段時間搞「大龍鳳」,從來冇好好把握正常溝通渠道,最後搞到政府唔再請佢哋出席,結果又話政府不公,直指佢哋犯賤!

主席都出聲阻止

此言一出,泛民群情激憤,要求何收回言論,何就將「犯賤」改成「賤格」,搞到委員會主席都要出聲阻止,話呢啲字眼都唔屬於議會上應用嘅字眼,問何會唔會收番有關言論。何見狀應承收番,但都忍唔住補多一槍,話希望佢哋以後唔好再咁賤格。泛民當然好火滾,主席惟有快快手宣布去到下一個流程,爭論先告平息。

卓妮

第一手消息請下載on.cc東網iPhone/iPad/Android/Windows Phone Apps