中環出更：豬瘟恐蔓延本港莊健成減少食豬手

晚宴有數百名政商界名人及鄉親出席，包括葵青區議會前主席方平、潮州商會永遠榮譽會長胡劍江、總會名譽會長林國良同埋副主席陳偉明等人。喺香港經營十幾個現代化街市同埋豬肉零售生意嘅林國良就話，唔使擔心豬瘟，因為豬隻喺香港屠場屠宰時都係生猛嘅，而且有政府人員即場抽驗，所以去到市場銷售唔會有大問題咁話。

方平雙喜臨門 最恨抱孫

方平一到場，個個都上前恭喜佢，事關佢兩名女兒喺兩個月之內先後出嫁，名副其實係雙喜臨門，其中細女Emma今個月初嫁畀國貨公司後人余偉傑，真係安樂晒。方平笑笑口話，依家最大心願就係等抱孫。

在旁嘅莊健成就爆料話，原本今屆輪到方平做總會主席，不過因為佢太忙，所以讓畀佢接棒咁話。

胡劍江啱啱送細女去澳洲讀書返嚟，期間仲睇埋澳洲網球公開賽，唔通佢係網球迷？佢笑稱唔係，係鍾意睇啫，但係十七歲大仔就好鍾意網球，仲去咗美國網球學校升學添。

佢好支持子女按自己嘅興趣去發展，個仔喺網球學校仲學到「三得」，即係「捱得、鬧得、輸得」，相信有助增加佢嘅抗逆能力。

林國良（左）同陳偉明（右）都唔擔心豬瘟襲港，照食豬肉。

胡劍江支持子女依自己興趣發展。

卓妮