政情：扭氣球花畀妹妹 劉小麗食檸檬
一向社會都認為女仔必定鍾意收花，但其實都係要睇邊個送嘅。尋日團體「社區前進」聯同一眾民主派議員喺太子開街站寫揮春，久未露面嘅前立法會議員劉小麗（小麗）用氣球整咗朵花，想送畀現場一位小妹妹時，點知就被對方拒絕，令小麗好尷尬咁苦笑。
仲未識扭豬仔
唔少社區主任或議員都有十八般武藝，小麗就識得扭氣球，劍、花、小狗同桔仔等花款都難唔到佢。佢話新年扭桔最受長者歡迎，有啲靚波可以放三星期都唔爆添，最可惜係豬年前都未學識扭豬仔喎。睇佢扭波都似模似樣，一啲都唔怕爆波，但似係太耐無扭，第一朵花嘅花瓣唔太對稱，要拆掉重來。
幾經努力扭出第二朵花後，小麗興高采烈上前送花畀一位小妹妹，點知妹妹擰頭就走。無奈被拒絕嘅小麗，只好自己帶住朵花自娛一吓，笑稱妹妹傷咗佢心喎。