中環出更：馬清揚鍾意行山 難忘被搶袋
近排野豬喺市區出沒嘅問題引起廣泛關注，唔少市民都被嚇到驚一驚。尋日卓妮喺東華三院主辦嘅香港首個智障人士馬拉松活動上，同名人嘉賓傾開健康話題。東華副主席馬清揚（Philip）就話自己成日去行山，試過被野生動物「偷襲」，不過就唔關野豬事，而係畀猴子搶咗個袋，佢同猴子鬥大力先搶番，真係有驚無險呀！
眾所周知，猴子鍾意食香蕉，Philip就話因為個袋入面有黃色物件，啲猴子以為係香蕉，先至吸引佢哋上前搶袋喎。經此一役，Philip可能未驚完，話啲猴子好惡，所以提醒大家行山時一定要小心防範猴子同野豬。
蔡榮星堅尼地城行到維園
東華副主席蔡榮星同埋總理晏紫都有到場，唔講唔知，原來蔡榮星係「長征」好手。佢平時食完飯就會以快步行形式，由中環行到位於銅鑼灣同天后交界嘅維園，試過有次係由堅尼地城出發行到維園添！橫跨幾個港鐵站，真係好犀利。佢笑笑口話，為咗方便隨時去行，會擺定啲鞋同衫褲喺車入面，咁就唔使騰嚟騰去喇。
社福界立法會議員邵家臻就話，以前未做議員時會去游水，依家因為太忙，就慢慢變成「零運動」，所以平時會行多啲路搭夠，例如喺立法會行落或行上一層先搭電梯，又或者係由金鐘行去中環先搭港鐵咁。唔單止咁，佢得閒仲會拉吓筋，試過喺上庭期間，坐喺犯人欄上挨住牆嚟拉添！不過好彩係休息時間啫，否則畀法官見到就唔太好喇！
卓妮