政情：田北辰話遲熟 中學無跟人睇三級片

田二少於一九六七年畢業，佢尋日重返校園憶起當年讀書嘅點滴，憶述讀緊中四嘅時候，唔少比較曳嘅同學仔放學會拉隊去睇三級片，「你知男仔學校(口架)啦，血氣方剛！」不過，田二少自言比較遲熟，「嗰陣未有咁嘅衝動」，所以冇跟埋一齊去，之後仲話當年寄宿嘅同學通常最曳，而佢自己就冇住宿舍，屬於乖學生。

另一方面，男拔於學界都出咗唔少運動健將，田二少就鍾情於打乒乓波，原因係自己唔夠氣，「踢親波都包尾」。

曾經係乒乓波校隊成員

講起打乒乓波嘅威水史，曾經係乒乓波校隊一員嘅田二少，最記得中四嗰年對英華書院嘅學界比賽，佢負責打決勝局，「嗰時好大壓力，打到滿頭大汗」，結果靠不斷用「滴滴仔」穩穩陣陣咁打，最後先贏到對手。