政情：徐英偉扮長者撐拐杖5分鐘就嗌攰
港府收緊申領長者綜援資格惹眾怒，各界狠批政府帶頭虐老，長者受難，勞工及福利局副局長徐英偉（Caspar）尋日出席香港傷健協會嘅活動，冇公開回應呢個爭議，只係着起特製套裝扮長者，寒背兼撐拐杖體驗吓老友記有幾辛苦。除此以外，Caspar仲試埋坐電動輪椅，同埋「裝假狗」扮大肚婆添。
着特製背心寒背行路
現場所見，大會安排Caspar着住一件特製背心，寒起背行路，搞到佢要篤住拐杖，扶住欄杆慢慢行先上到斜路，與此同時，Caspar仲戴埋「老花鏡」，感受吓老人家眼矇矇，要用放大鏡先睇到巴士站牌啲字嘅感覺。
現年只有四十多歲嘅Caspar行咗唔夠五分鐘，就已經嗌「好攰啦」，感受到老人家平日出街「一啲都唔容易」。話時話，政府下月一日起收緊長者綜援申請門檻，變相叫六十歲老友記出番嚟做嘢，但Caspar自己行幾分鐘都嗌攰，點服眾呢？