政情：野豬累事？ 行會出席率劉業強又包尾
二○一九年開始冇耐，又係時候為去年埋單結算，行政會議負責為香港重要政策拍板作決定，不過就唔係每位行會成員都咁勤力開會。根據二○一八年行會非官守成員出席會議嘅統計數字，十六名非官守成員當中，冇人係出席晒所有要出席嘅會議，而前年行會出席率已經包尾嘅「三料議員」劉業強去年出席率只有七成四，仍然無法脫離最懶惰行會成員之位。唔通日前喺立法會提出引入野豬天敵嘅佢，因忙於留意野豬出沒情況，所以去唔到開會？
行會喺去年一共開咗三十八次會議，不過基於有議員因個別討論項目而要避席，所以每人出席會議嘅次數會因人而異。十六名非官守議員中，出席率最高嘅都只得九成半，即缺席兩次會議。而出席率達九成半嘅就只有四人，包括行會召集人陳智思同立法會議員黃國健（KK）。
身兼立法會議員嘅行會成員一共有五人，包括KK、林健鋒（Jeffrey）、葉劉淑儀（葉劉）、張宇人（Tommy）同廖長江（Martin），五人出席率都超過八成。Jeffrey同葉劉出席率有九成二，Tommy有八成七，但身為立法會「建制派班長」嘅Martin就只得八成四，係五名「雙料議員」之中出席率最低嘅一個，同時亦喺十六名非官守議員中排尾三。
而身兼行會成員、立法會議員同區議員嘅「三料議員」就有張國鈞（Horace）同劉業強兩人。身兼幾職係咪就難啲分配時間？睇番Horace嘅出席率就有九成二，比劉高出十八個百分點。點解兩人同為「三料議員」，出席率會差咁遠？唔通因為劉多咗鄉議局主席一職，又忙於關心野豬襲擊市民問題，所以出席率先差強人意？
話要開區會 「逼住缺席」
本身係屯門區議員嘅劉接受查詢時話，屯門區議會大會每兩個月先召開一次，而會議時間係星期二早上，同行會相撞，由於區議會召開次數較少，缺席就會錯過太多嘢，所以逼住兩個月缺席一次行會會議。呢個解釋係咪令人滿意相信納稅人都心中有數。
史美倫繼續排尾二
至於另一行會成員、香港交易所主席史美倫就同劉一樣成功維持排名，去年出席率為八成一嘅佢繼續排尾二，拋離劉七個百分點，令劉成為唯一一個出席率唔夠八成嘅行會成員。特首辦就解釋，行會非官守議員或因出席其他與公職有關嘅會議或活動，所以未能出席行會喎。