中環出更：三隧分流爭議大 政黨急做民意調查
為改善紅隧、東隧同西隧三條隧道擠塞情況，政府提出三隧分流建議，但三條隧道價格調整等問題就引起社會爭議。政府將喺本月廿三日立法會大會提出有關三隧分流嘅議案，爭取立法會支持政府方案。立法會辯論未開始，新民黨上周先喺網上就「三隧分流」做問卷調查，問市民對政府三隧分流方案嘅睇法。唔通佢哋想率先發動民意戰？
容海恩：按民調決定立場
新民黨立法會議員容海恩（Eunice）話，該黨目前並未決定支持或反對政府方案，所以會根據民意調查結果決定投票意向。佢又話，市民對三隧分流意見分歧好大，以佢所屬嘅新界東選區為例，原本以為方案建議東隧加價，將軍澳區一帶較多東隧使用者，該區反對聲音會較大，點知好多人都支持，所以都要整理好晒啲資料，先決定是否支持政府。
而Eunice自己平時就三條隧道都會使用，佢話就算落實三隧分流，都會考慮時間同距離先決定行邊條隧道，價錢並非唯一考慮，所以佢都希望政府可以提供多啲數據，解釋多啲實際運作同成效。
卓妮