中環出更：用足球凝聚青年霍啟山每星期練波
體育運動唔止可以強身健體，仲可以凝聚人心，所以若要凝聚年輕人，運動都係一個好途徑。香港廣東青年總會（總會）執行主席霍啟山熱愛足球就眾所周知，早排佢喺總會活動上話要積極籌辦足球比賽，而佢之前已經喺本港挑選咗八隊足球隊，仲帶佢哋返內地比賽，佢自己仲落場踢埋一份添！
霍啟山話自己雖然工作忙，但生活都需要平衡，所以每個星期日都必定會抽時間踢波，雖然平時踢開五人足球，同十一人踢嘅大球場唔同，但總算有持續同穩定嘅操練。霍嘅足球隊大都係後生仔，如果佢唔勤力啲操練，恐怕落到場都唔夠佢哋踢喇。
胡智政鍾意搞講座幫年輕人
同場嘅仲有總會主席曾智明、常務副主席郭基煇、沙田少年警訊名譽會長會名譽會長胡智政（Ronald）、金紫荊女企業家協會常務副主席李凱琪（Clara）、香港青年服務領袖獎獎勵計劃副主席陳志豪。對於青年工作，Ronald就話鍾意搞講座多啲，認為要幫到時下年輕人嘅話，就應該幫佢哋做好生涯規劃，所以近年都積極喺中學舉辦講座。不過咪以為講座就一定好悶，事關Ronald邀請嘅講者五花八門，唔止有企業高層、傑出青年，仲有導演、樂隊、遊戲開發商等，咁樣學生哥就可以得到更多實用建議喇。
而Clara亦都認同年輕人係需要栽培，仲話近年香港經濟唔太明朗，有好多不穩定因素，感覺到社會上冇咁多正能量，所以佢都覺得要搞多啲同年輕人有關嘅活動，將佢哋組織埋一齊去為社會發放正能量，佢仲話年輕人出去睇多啲，擴闊目光，感受就會深刻好多喎。
卓妮