政情：醫局推廣差輪急症有App查九成人未聽過
近年政府及公營機構開發嘅部分手機應用程式（App）被揭「又貴又廢」，個別App更因推廣不力，效用大打折扣，甚至係冇乜人知道佢哋嘅存在。最新有政黨調查顯示，九成曾使用公立醫院急症室嘅市民，唔清楚醫管局網頁及手機應用程式「醫管局與你」實時公布急症室輪候時間，另有約九成受訪者唔知道「e藥通」App實時公布醫院藥房取藥情況。話時話，為免得物無所用，食物及衞生局局長陳肇始及醫管局主席梁智仁都要聯手諗吓計，做好有關App嘅宣傳推廣工作，等市民唔使等到頸都長都唔敢走開嘞！
公立醫院急症室輪候時間動輒以小時計，工商政黨經民聯於上月以問卷調查方式，在街頭成功訪問三百六十五名曾使用公立醫院服務嘅市民，除咗問及係咪知悉「醫管局與你」同「e藥通」兩個Apps嘅存在，亦問及係咪滿意依家急症室輪候服務、取藥輪候時間等。
醫生指倘無人用有失原意
調查結果顯示，三成四受訪者對急症室輪候時間感到「不滿意」及「極之不滿意」，另有近四成三表示「一般」，表示「滿意」及「十分滿意」合計略多於兩成四。至於取藥輪候時間，最多近四成四受訪者表示輪候時間為三十分鐘至兩小時，其次有三成人指輪候時間為十五至二十分鐘，另有一成半稱輪候時間為二至四小時。
今次調查揭示，多達九成人唔知道「醫管局與你」同「e藥通」兩個Apps提供嘅服務，令人意外。根據當局提交予立法會嘅資料顯示，「醫管局與你」App嘅開發成本為二十二萬五千元，「e藥通」則涉及五十一萬元，而截至去年二月為止，兩個Apps有超過八萬嘅下載次數。
眼科醫生龐朝輝認為，醫管局設計有用嘅手機應用程式，但效率未盡如人意，若然無市民使用，就失去設立手機應用程式原意；另有政黨代表提及，政府檢視依家醫療系統不勝負荷問題嘅同時，醫管局有需要將依家十多個Apps整合為一個App，提供一站式服務。
醫管局：正開發App整合服務
醫管局發言人接受查詢時話，過去不時透過各類場合，提醒公眾可喺醫管局網頁及「醫管局與你」App查閱各急症室等候時間，又透露醫管局正開發全新手機應用程式，以整合依家各手機應用程序，預計於今年底陸續推出。