中環出更:讀書坐唔定 羅致光自嘲「罰系」學生

現屆政府不時有高官懶懶閒,因而被嘲諷係「佛系」。IQ(智商)高達一百六十嘅勞工及福利局局長羅致光自爆都係「罰系」一族,皆因細個讀書時經常坐唔定,就算身兼副班長同領袖生,都一樣畀老師趕出班房罰企。自揭瘀事嘅羅致光其實係想力銷當局嘅政策,話畀大家知佢都有百厭過,希望大家關注吓有特殊需要嘅小朋友啫。

老師掟粉刷 隨手接到

羅致光尋日喺網誌大爆少年事,佢話讀書時經常被罰抄毛筆字、罰企及留堂,小學操行連「乙」都未攞過,由於姓羅,因此有個「雅號」叫做「有恆氏」喎。頑皮嘅佢更練得一身好武功,隨手都接得住老師掟嘅粉筆同粉刷,看似有過度活躍嘅徵狀,令佢不禁回想自己係咪有特殊教育需要。

佢認為要了解各種表面行為問題背後的原因,對老師同家長都係一大挑戰,要透過加強訓練、公眾教育同支援服務,係增加認知嘅不二法門。佢更提到「到校學前康復服務試驗計劃」已於一八/一九學年恒常化,當局未來數年會繼續提供不同學前或早期教育服務等,以令部分學前特殊康復服務有望變為「零輪候」。

卓妮

第一手消息請下載on.cc東網iPhone/iPad/Android/Windows Phone Apps