中環出更：仔女改名彭志宏唔搵玄學家搵學者
俗語話：「唔怕生壞命，最怕改壞名」。好多父母都為新生子女取名絞盡腦汁，唔少人就會搵玄學家幫手。樂善堂副主席彭志宏嘅太太王文博下個月就要分娩，已有兩名子女嘅彭志宏話，唔會搵玄學家幫手改名，因為另有高人相助咁話。
彭志宏口中嘅高人就係城中知名學者何文匯，佢話一對子女嘅名都係先自己起幾個名，再徵詢相識多年嘅何文匯意見。佢大讚何對漢字嘅知識非常深厚，起名時除咗會考慮五行，亦會着重讀音同字義。好似當初佢原本為囡囡取名「靖如」，但何文匯一聽即耍手擰頭，嫌發音同「蒸魚」相似喎，後來就改為「靖媛」喇！
樂善堂主席李聖潑嘅名夠晒罕見，原來都有段古。佢話「聖」字係按族譜輩分而定，冇得改動，姑姐認為佢五行欠水，最後一個字必須有「三點水」嘅部首，而「發」係吉利嘅字，所以就取個「潑」字。佢笑稱自己嘅名預示啲錢財係要潑出去，所以就加入慈善團體。最近佢就自掏腰包為樂善堂轄下嘅中小學天台添置太陽能光伏板，除咗可啟發學生對環保同新能源嘅關注，又可以賣電畀電力公司，所得收入可撥做獎學金。
李聖潑話添置太陽能光伏板嘅錢若果放入銀行收息，回報甚低，投放於教育方面更有效益咁話。
蕭楚基倡自備可重用膠牙籤
講起環保，仁愛堂諮議局委員蕭楚基都有留意「走塑」風潮，食肆紛紛停止提供塑膠飲管。但佢認為環保嘅重點應該在於物件能否循環再用，若果食客都習慣自備可多次重用嘅塑膠牙籤，而唔用一次性木製牙籤，就更加環保！
卓妮