政情：公民講場：今年派唔派錢 陳茂波又賣關子

下個月底財政司司長陳茂波就會公布新一份財政預算案，最令人關心嘅當然係政府派唔派錢啦！陳尋日出席電台節目被問到有關問題時，就話政府去年有一千多億元盈餘，今年可能會少三分之二，客觀情況上有所不同，現階段仍然聽緊好多唔同意見，仲有好多因素要考慮，所以要先賣個關子咁話。政府去年公布財政預算案後，宣布透過關愛共享計劃向未有受惠預算案嘅市民每人派發四千元，但到依家都仲未落到市民袋，就算今年話會再派錢，市民都唔知要等幾耐先有得拎喇。