政情：鄭錦鐘右眼突失明 急急做手術
急病真係可以毫無先兆，保良局前主席鄭錦鐘早前喺馬場出現，講起去年十月底其右眼突然失明，要即刻做一個全身麻醉嘅手術，手術後第一個星期佢都睇唔到嘢，之後先逐漸睇得番嘢咋。究竟佢隻眼發生乜事呢？
視網膜裂咗
鄭講起件事時雖然語氣輕鬆，但其實當時病況都唔輕。佢話，可能因為年紀大，有啲退化，又睇得手機多，加上本身有近視，有日健身時太用力同速度太快，視網膜就裂咗，拉到血管穿咗，眼球內入咗好多血，右眼完全睇唔到嘢，但佢照鏡時都睇唔出隻眼原來有問題。
佢話，發現自己右眼睇唔到嘢已經即刻去搵醫生，醫生就立即安排佢入院，第二日做手術，手術後毋須戴眼罩，不過沖涼時要好小心，唔可以入水，後來先至逐漸睇得番嘢。對於今次突然出現狀況佢就話自己唔擔心，仲話就算得一隻眼都睇到嘢，而且都信得過醫生，仔大女大又有孫，冇有怕咁話。