政情：張國鈞難分身 做律師只證婚

大部分業務由拍檔處理

立法會唔少本身係律師嘅議員都有婚姻監禮人資格，Horace就係其中之一。佢仲笑言自己係「專業證婚」，皆因佢擔任三料議員後，已經冇乜時間再兼顧律師工作，律師樓大部分嘅業務都已交畀其拍檔處理，唯一要由佢親自出手嘅就只係得番證婚喇。

證婚工作主要係安排男女雙方宣讀結婚誓詞，兼做下司儀炒熱氣氛，相比起喺立法會會議上長篇大論咁發言，對Horace嚟講只係小兒科。Horace就話，其實只係熟能生巧，好似去年底身邊就有唔少朋友結婚，包括荃灣區議員林琳及其健身教練，佢哋都係搵佢證婚。佢就話好樂意幫手，因為可以感受婚禮嘅喜慶，仲可以乘機重操律師「故業」。