政情：葉建源飛華欣過聖誕 難忘愈行愈淺沙灘
聖誕節假期啱啱過去，唔少議員都離港過聖誕，其中教育界立法會議員葉建源就飛咗去泰國旅遊勝地華欣，過咗個熱辣辣嘅聖誕。佢仲話，今次嘅旅程令佢最難忘嘅係去咗一個好得意嘅沙灘，而呢個沙灘係愈行出海愈淺水。聽落又真係幾特別噃。
去主題市集打卡留念
葉建源話，佢初初由岸邊開始行落海時，啲水位慢慢由腳眼位升到膝頭哥位置，當時佢抬頭一望，見到唔少人都喺前面遠處戲水，當中仲有小朋友。於是佢就再繼續向前行，行到大約距離岸邊五十呎時，發現水位竟然慢慢由膝頭哥降至腳眼，覺得好驚奇。不過因為當時距離岸邊已經有啲遠，加上前面亦都冇其他人戲水喇，所以佢就行番轉頭，冇再繼續探險。
唔止去沙灘玩水，佢今次亦都去咗華欣附近嘅鎮行吓，仲去咗一個以懷舊做主題嘅市集，入面有好多懷舊嘢睇，仲有唔少壁畫，佢自己都有「打卡」影相留念。