中環出更：財會頂更 陳振英首擔正
立法會財務委員會尋日開會，上任副主席三個月都冇嘅金融界立法會議員陳振英（Ronick）首次「擔正」，代替財委會主席陳健波（波哥）主持會議。雖然俗語有話「新官上任三把火」，不過Ronick就啱啱相反，主持會議非常寬鬆。
有耐性畀朱凱廸問足四次
話說民主派議員朱凱廸一向係「問題議員」，喺財委會經常將問題問完再問，尋日Ronick就非常有耐性，畀朱問足四次，之後到議員梁耀忠發言時，梁明明已經用盡其發言時間，但Ronick都容許佢繼續發言。Ronick主持會議嘅「處女戰」咁鬆手，民主派議員自然唔會發出噓聲，但代價就係用咗兩個鐘先通過到一項爭議唔大嘅撥款，而波哥其後亦都趕返嚟主持番個會。
Ronick事後解釋，因為波哥要出席慈善活動，所以要其代為主持會議，而佢亦一早「做功課」，同埋將文縐縐嘅主席詞改到適合自己嘅口語，等佢讀嘅時候通順啲。佢又透露下次佢長時間主持財會將會係審議財政預算案嘅時間，因為波哥已預告屆時有一半時間都畀佢主持喎。
卓妮