土地供應專責小組前日發表土地大辯論最終報告，合共提出八個選項建議，包括將填海約一千公頃嘅東大嶼都會作為建議優先選項之一，小組主席黃遠輝尋日喺電台節目中疑意有所指，呢個一千公頃嘅優先選項，唔等同有主流民意支持填海一千七百公頃嘅明日大嶼計劃。眾所周知，依家政府負責力推明日大嶼嘅係發展局局長黃偉綸，預計今年上半年會向立法會工務小組申請前期工程撥款，黃遠輝今次有言在先，黃偉綸好難當聽唔到之餘，如果要強推明日大嶼計劃，睇怕真係撼頭埋牆嘞！
