政情：四點鐘許Sir出山 任陽光巴士執董
外號「四點鐘許Sir」嘅警務處前助理處長許鎮德重出江湖，根據公務員事務局最新於網上公布嘅資料顯示，許Sir尋日起出任陽光巴士有限公司執行董事，工作範圍包括領導公司、營運發展及行政管理等。
早以觀察員身份了解運作
據許Sir身邊嘅朋友講，原來許Sir舊年五月退休之後，一直有多個大機構透過獵頭公司想羅致佢，包括有上市公司、物業管理公司等，結果許Sir選擇咗做陽光巴士嘅執行董事，雖則今日先係首個工作天，但許Sir一早做定功課，之前已經以觀察員身份了解公司運作，相當落力。
其實許Sir退休嗰陣，曾經話自己身體健康狀況同精神都好好，會重返職場，估唔到事隔七個月時間，就已經有新發展。據知，許Sir因為認同陽光巴士母公司載通管理層嘅理念，加上做督察嗰陣，又曾參與購買同管理警察車隊，相信許Sir喺新工作好快適應同上手嘞！